Преспанското Езеро со последни сили се бори за живот. Освен губитокот на вода кој од година во година е се поголем, овој природен басен се соочува со се поголемо загадување од прекумерната употреба на пестициди врз овоштарниците во Преспа.
Според анализите на Министерството за животна средина овоштарите употребуваат фунгициди, инсектициди и хербициди или околу 65 тони пестициди годишно. Во повеќе наврати во езерото завршуваа и непродадените јаболка, што земјоделците не успеваа да ги продадат, како и амбалажите од вештачките ѓубрива.
Панде Савески е овоштар 20 години и вели дека се повеќе се користат хемикалии врз овошките, а свеста за последиците кај овоштарите е мн мала.
Овие количини на хемикалии што годишно се користат во регионот стигнуваат до водата при што под закана се речиси 2.000 ретки и ендемски видови риби, птици и цицачи. Загадувањето на езерото доведува до цветање на алгите, намалување на кислородот во водата што доведува до создавање мртви зони. Истовремено се активира процес на еутрофикација или создавање штетни алги.
Хемикалиите истовремено влијаат и на размножувањето на живиот свет. Од секторот за животна средина од Ресен велат дека најновите анализи укажуваат на тоа дека е зголемено органското и нутриентно оптоварување во водата од истражните локалитети, односно има континурано внесување на нутриенти во езерскиот екосистем пред се преку површинските дотоци – реките и дренажните води од околните земјоделски површини. Посебно алармантна состојба со органско и нутриентно оптоварување е забележана во литоралот Претор во близина на успорната градба – браната на Голема Река, која претставува и најголем потенцијален загадувач во литоралната зона, односно Преспанското Езеро во целина.
Добиените резултати укажуваат на силно антропогено влијание (отпадна вода, земјоделски активности, неодржливо управување со водата и неправилно користење на современи агротехнички методи за заштита на овошните насади и земјоделските култури со употреба на пестициди и вештачки ѓубрива).- велат од Секторот за животна средина Ресен.
И екологистите изразуваат загриженост за загадувањето на регионот. Но градоначалникот на Ресен Јован Тозиевски кој и самиот е овоштар смета дека пестицидите кои се употребуваат не се опасни за езерото.
Освен пестицидите потенцијални загадувачи на езерото се и реките кои се влеваат во него отпадните води од домаќинствата, индустриското загадување и многуте депонии со нелегално отстранет отпад.
Активистите бараат преминување кон органско земјоделство и инвестирање во одржлив туризам како и обука на преспанските овоштари како со употреба на помалку хемикалии да добијат успешен род.
Крикот за спас на Преспанското езеро е гласен и сериозен и што поскоро треба да допре до слухот на надлежните институции,властите и државата за да се спречи опустошување на уште едно национално природно богатство.
Извор: 24vesti.mk
