Европскиот вицешампион Интер ја потврди вечерва разделбата со својот тренер Симоне Инзаги, само неколку часови откако веста претходно ја најавија дел од италијанските медиуми.
„Би сакал да му се заблагодарам на Симоне Инзаги за сработеното, за покажаната страст и за искреноста во денешната дискусија, што доведе до заедничка одлука за разделба“, изјави претседателот на Интер, Џузепе Марота.
Интер имаше лош крај на сезоната откако го загуби финалето на Лигата на шампионите, заврши втор во Серија А и беше елиминиран во полуфиналето на Купот на Италија.
„Дојде време да се збогувам со овој клуб по четиригодишно патување во кое дадов сè од себе“, порача во посебна изјава Инзаги, кој со Интер освои една титула во Серија А, два Купа на Италија и три Суперкупа на Италија.
Италијанските медиуми објавија дека Инзаги ќе му се приклучи на Ал-Хилал од Саудиска Арабија и ќе го предводи тимот на Светското клупско првенство на кое, исто така, ќе настапи Интер.
Извор: kurir.mk
