Коалицијата Вреди вечерва во Скопје официјално го промовираше Централниот изборен штаб во пресрет на локалните избори, закажани за октомври оваа година. За шеф на штабот е назначен пратеникот Аднан Азизи.
На настанот, кој се одржа во просториите на Филхармонијата, претседателот на Алтернатива, Зеќирија Ибраими, изјави дека со формирањето на Централниот штаб, Вреди уште еднаш ја потврдува својата определба за заеднички настап на претстојните избори.
– Денеска сме тука да го промовираме поставувањето на Централниот штаб на Вреди . Со овој орган уште еднаш потврдуваме дека Вреди се унифицира како заеднички субјект за настап на локалните избори наесен. За шеф на штабот е веќе избран пратеникот Аднан Азизи – изјави Ибраими.
Одговарајќи на новинарско прашање за тоа кога Вреди ќе се трансформира во официјална политичка партија, Ибраими нагласи дека темата веќе била разгледувана, но ја оцени како прашање од административен карактер.
– Тоа е прашање што има и правни и политички аспекти, но веќе е помалку важно бидејќи е во сферата на администрацијата. Вреди веќе функционира како еден заеднички субјект – додаде тој.
На прашањето кој е лидерот на Вреди , Ибраими одговори дека за тоа сè уште не се дискутирало внатре во коалицијата, посочувајќи дека фокусот не е на личностите, туку на концептот.
– Не се важни личните имиња во споредба со Вреди како политички субјект – истакна Ибраими.
Настанот претставува дел од подготовките на Вреди за претстојната изборна кампања, со која коалицијата планира засилен теренски настап и координирани активности во сите општини.
ИЗВОР: ТВ 21
