Ќе стане ли Македонија една изборна единица? Предлог законот ЛДП утре ќе го поднесе во Собранието. Ова е трет пат како партијата предлага една изборна единица, откако истата беше одбиена во претходните два парламентарни состави.
Од ЛДП велат дека очекуваат поддршка од пратениците.
„И денес, како и претходно, даваме силна поддршка за воведување на една изборна единица, отворени листи, како и вклучување на предлозите од граѓанскиот сектор за независни листи во креирање на новиот Изборен законик. Ова не е нова иницијатива за ЛДП. Нашите пратеници во два претходни парламентарни состави поднесуваа предлог-закони за истата оваа реформа. За жал, тогаш тие иницијативи не добија поддршка. Но ние не се откажуваме.“ – Љубен Аврамовски портпарол на ЛДП.
Веќе во понеделник и Демократскиот сојуз најави дека ќе поднесе ваква иницијатива во Собрание, а поддршка има и од ДОМ.
Темата за измените на Изборниот законик и воведување на една изборна единица ја отвори премиерот, кој претходно упати повик до опозицијата во Собранието да ги поддржат измените. Но, побара да се дозволи и дијаспората да гласа, преку формирање на избирачки места во државите каде што е тоа дозволено согласно Устав, надвор од Дипломатско-конзуларните претставништва. Лидерот на Социјалдемократскиот сојуз Венко Филипче пак изјави дека се подготвени да разговараат, но дека за ваквиот предлог треба да се разговара и со останатите политички партии.
Претходно пак седум граѓански иницијативи, поднесоа барање до Собранието и до Министерството за правда да се направат итни измени на Изборниот законик. Велат оставена е правна празнина откако Уставен суд ги укина членовите 17 и 18 од измените во Изборниот законик донесени на 7 март 2024, со кои партиите од власта и опозицијата здружено го зголемија прагот за потребни потписи на 1 отсто од гласачкото тело во изборна единица за учество на независните листи на изборите.
Извор: 24vesti.mk
