Унгарскиот премиер Виктор Орбан изјави дека Унгарија сака да ја задржи Украина надвор од Европската унија бидејќи, како што рече, членството на Украина во ЕУ би значело дека земјата „ќе ги апсорбира сите пари на Унгарија“.
Во интервју за јавното радио, Орбан рече дека западните лидери одлучиле да постигнат договор со Украина за одржување на армија од околу еден милион војници, чии трошоци ќе ги покриваат европските земји, пренесе МТИ.
Унгарскиот премиер додаде дека „наместо да ги зајакне сопствените вооружени сили, Западна Европа и плаќа на Украина за нејзините платеници“.
Според него, ова може да претставува сериозен безбедносен ризик за Европа, бидејќи на крајот може да се финансира армија чии намери „нема секогаш да бидат пријателски или барем нема да има гаранција дека тоа ќе биде така“.
– Членството на Украина во ЕУ е поврзано со тоа, бидејќи е многу полесно да се носат финансиски одлуки во корист на Украина ако таа земја е членка на ЕУ, отколку ако не е – рече Орбан и додаде дека Унгарија, заедно со другите централноевропски земји, ќе ја плати цената на пристапувањето на Украина во Унијата.
Премиерот ги повика Унгарците да гласаат на референдумот во 2025 година, кој ќе се занимава со прашањето за потенцијалното членство на Украина во ЕУ.
– Да не дозволиме други да одлучуваат наместо нас – нагласи тој во апелот до граѓаните.
Извор: kurir.mk
