Генералната секретарка на Собранието, Марина Димовска, имаше обраќање на 4. Состанок на генерални секретари на Парламентарното собрание на Медитеранот (ПСМ), во рамките на Округлата маса на тема: „Придонесот на Парламентарното собрание на Медитеранот во новиот ЕУ-Пакт за Медитеранот”, што се одржува во Маракеш, Мароко, информираат од собраниската прес-служба.
-Новиот ЕУ-Пакт за Медитеранот претставува повеќе од политичка рамка, тој е обновена заложба за заедничките вредности: солидарност, човечко достоинство, одржлив развој, безбедност и мир. ПСМ е клучен столб во овој процес – како глас на народот и како форум за инклузивен дијалог, законска усогласеност и координирано дејствување, истакнала Димовска во обраќањето.
Според неа, со оглед на тоа што нашата земја долги години е во чекалната на ЕУ поради билатерални прашања, заложбата за соживот, соработка, за партнерство, мора да биде заедничка и искрена. Како држава, истакнала, остануваме целосно посветени на реформите и усогласување со ЕУ стандардите.
-Придонесот и како Собрание и како Парламентарно собрание на Медитеранот, е клучен во областа на стабилноста и безбедноста, во соочувањето со заедничките предизвици како миграциите, борбата против тероризмот, организираниот криминал, сајбер-безбедноста. Како членки на ПСМ, мора да бидеме фокусирани на одржливиот развој и климатска акција, но и на зелената и правична транзиција. Преку ПСМ, имаме можност да ги претвориме законодавните амбиции во практични регионални политики – во енергетско поврзување, циркуларна економија, чисти технологии и инфраструктура отпорна на климатски промени. Како држава, пак, сме посебно фокусирани на младински политики, за подобра и попросперитетна иднина за младите и спречување на одлив на мозоци, рекла Генералната секретарка на Собранието Димовска.
Како што истакнала во обраќањето, парламентарната дипломатија и регионалната соработка се незаменливи алатки за градење мир и напредок. Само преку дијалог и заедништво, нагласила Димовска, може да ги надминеме сите предизвици и да чекориме кон демократски напредок и просперитет – заклучи генералната секретарка на Собранието.
Извор: 24vesti.mk
