Од вчера напладне до денеска, во четири одвоени случаи во близина на грчките остров Гавдос и Крит биле откриени и спасени вкупно 228 мигранти, кои се пренесувале со пет чамци, јави дописничката на МИА од Атина.
Три од случаите се во морскиот дел јужно од Крит, а едниот е југозападно од малиот остров Гавдос.
Од Крајбрежната служба на Грција информираа дека во текот на денешниот ден, силите на Фронтекс откриле и спасиле вкупно 78 лица во два чамци јужно од Крит, а во истиот дел бил откриен уште еден чамец со 52 мигранти.
Претходно, како што објави утрово МИА во морскиот дел на 12 наутички милји југозападно од малиот грчки остров Гавдос биле откриени и спасени 47 мигранти, кои се пренесувале со чамец.
Вчера пак, на плажа во југозападниот дел на Крит пристигнала едрилица во која имало 51 лице, меѓу кои и 11 деца.
Морскиот дел јужно од Крит и од малиот остров Гавдос, што и е најјужната точка на Европа, во изминатиот период е дел од мигрантските рути што ги користат криумчарите за нелегално пренесување мигранти од Либија кон Грција или Италија. (МИА)
Извор: kurir.mk
