„Секое дете, секое бебе во Газа е непријател“, изјави поранешен пратеник од крајната десница во Израел

АНКАРА (АА) – Поранешниот крајно десничарски израелски пратеник Моше Фејглин повика на целосна окупација на Појасот Газа со зборовите: „Секое дете, секое бебе во Газа е непријател“, известува Анадолу.

Фејглин, познат по блискоста со премиерот Бенјамин Нетанјаху, во изјавата за телевизискиот Канал 14 истакна дека Газа треба да биде целосно окупирана.

Повикувајќи на изградба на населби за Израелците во Газа по окупацијата на цела земја, Фејглин излезе со тврдење дека „ниту едно палестинско дете не треба да остане таму“.

„Ние сме во војна против постоењето на Газа“, рече Фејглин и додаде:

„Секое дете, секое бебе во Газа е непријател.“

„Секое дете на кое во моментов (во Газа) му давате млеко, ќе го убие вашиот син 15 години подоцна“, тврди Фејглин, противејќи се на влегувањето на хуманитарна помош во Газа, каде што Палестинците се борат со глад.

Два месеца, почнувајќи од 18 март, израелската Влада не дозволи ниту еден камион со хуманитарна помош да влезе во Газа, каде што живеат приближно 2,3 милиони Палестинци и се борат со глад.

Поради меѓународниот притисок администрацијата на Тел Авив дозволи ограничен број камиони со хуманитарна помош да влезат во Газа, почнувајќи од 19 мај.

Израелската армија објави дека 93 камиони со помош влегле во Газа, но Обединетите нации соопштија дека помошта сè уште не им е доставена на Палестинците.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.