Црниот пазар за забавите и свечените премиери на Канскиот филмскИ фестивал е жив и здрав, според листата што ја виде филмското списание „Скриндејли“. Една од најскапите понуди е пар билети за премиерата на „Елинор“, режисерското деби на Скарлет Јохансон во селекцијата Извесен поглед, и за забавата што ќе следи на 20 мај, кои се продаваат за 5.495 долари по лице. Фотографија со Јохансон е понудена за дополнителни 1.995 долари.
Дистрибутерот на филмот „Сони Пикчерс класикс“ беше недостапен за коментар. Но портпаролот на фестивалот остро одговори:
„Влезниците што ги издава Канскиот фестивал се бесплатни и строго е забрането да се продаваат. Секој обид за продажба или купување билети е незаконски и може да доведе до правна постапка. Купувањето билети повлекува значителни ризици, вклучително и можноста да ви биде забранет пристапот до проекцијата. Секоја употреба на билет што е изменет или манипулиран ќе се смета за измама. На инволвираните поединци ќе им биде забранет влезот на местото на одржување. Дополнителни санкции може да наметне Фестивалот“.
Листата со понуди за билети на црно ги оценува очекуваните можни искуства за секој филм. „Умри, љубов моја“ на Лин Ремзи со Џенифер Лоренс и Роберт Патинсон во главните улоги, се продава според формулата „Враќање на Ремзи + моќни главни улоги = уметност на високо ниво + интрига“. За „Феникиската шема“ на Вес Андерсон се ветува дека „Секоја капка на Вес е културен момент. Очекувајте прецизни визуелни слики + фестивалски великодостојници“. А „Сентиментална вредност“ на Јоаким Трир се очекува да биде „Чисто авторско гориво“.
Достапни се различни пакети, според тајниот список. Искуството од прошетка само на црвениот тепих чини 2.995 долари по лице, додека пак пакетот со премиера на ниво 1 за најголемите филмови и актерската екипа чини 10.795 долари. Вклучува фризура и шминка во хотелот, лимузина од хотелот до црвениот тепих и збир на фотографии – со можност за услуги на фотограф на агенцијата Гети за дополнителен надомест во зависност од достапноста.
Присутните кои се подготвени да платат 4.275 долари, можат – во зависност од достапноста – да уживаат во пакет со син тепих, вечера, доделување награди и после забава на наградите ВИБА (Светски награди за инфлуенсери и блогери) на 23 мај на спротивниот крај на канската Кроазета во хотелот „Мартинез“.
Најскапи се билетите со специјална понуда за хуманитарната гала „амФАР“ во „Хотел ди Кап“ и чинат 23.000 долари по лице.
ИЗВОР: sdk.mk
