Претседателката на Асоцијацијата на осигурително-брокерски друштва, Оливера Клинчарова во Аргумент плус рече дека, во Македонија потребно е да се воведе финансиски правобранител кој ќе може да ги заштитува граѓаните од финансиските измами.
Според неа, многу е важно да се зборува и за финансиската писменост на младите посебно во, како што рече дигитално време на инвестиции и валути.
„Јас би сакала побрзо да воведеме еден финансиски правобранител кој ќе биде заштитник на граѓаните специфично за финансии бидејќи имаме многу финансиски друштва, брзи кредити, разни пирамиди и секој поединечен случај заслужува внимание. Треба да го направиме час поскоро за да ги заштитеме граѓаните. Потребно е некој кој континуирано ќе работи на вакви случаи“, рече Клинчарова.
Таа зборуваше и за важноста на финансиската писменост.
„Живееме во дигитално време и проблемот со неинформираноста и недоволната финансиска писменост е голем проблем. Во денешно време се појавуваат разни инфлуенсери кои наведуваат на финансирања во разни платформи, синџири кои немаат лиценца, не се контролирани, немаат супервизија. И би апелирала сите да се едуцираме посебно младите дека треба да се вложува и инвестира но треба да се советуваш бидејќи светот на парите е комплексен“, додаде Клинчарова.
Извор: 24vesti.mk
