Власта на ДПМНЕ ги понижува работниците и ги гази нивните права. За прв пат, минималната плата беше договорена без социјален дијалог, без учество на синдикатите што резултираше со „зголемување“ од срамни 1.800 денари. Истовремено, власта не го почитува ниту општиот Колективен договор – не ги зголемува платите во јавниот сектор за предвидените 12,5%, истакна на прес конференција Кристина Костова, потпретседателка на СДСМ.
„И вработените во Култура се соочуваат со истите понижувања. Се чекаат некакви „насоки“ од Министерството за култура, како да станува збор за доброволна акција, а не за законска должност“, нагласи Костова.
Потпретседателката на СДСМ посочува дека власта ја одолговлекува исплатата на законското зголемување според Општиот Колективен договор за јавен сектор.
„Тој колективен дговор беше потпишан во 2019 година, во време на СДСМ со што платите во културата ги зголемивме за 53%. Со промената на власта покачувањата на платите се запрени“, укажуваат од СДСМ.
Од таму сметаат дека изговорите се апсурдни, тенденциозни и далеку од правни – лични желби и тивки одлуки на поединци го диктираат стандардот на оние што ја градат културната сцена на оваа држава.
„Наместо јасна поддршка има само нова доза понижување на вработените во културата“, потенцираше Костова.
Таа наведе дека во дел од институциите под надлежност на министерството за култура веќе се доставени насоки што директно го прекршуваат Колективниот договор
„Платите ќе бидат пониски дури и од тие исплатени во февруари. Иронично, само затоа што не се усогласени со растот на минималната плата иако и тоа е законска обврска Ова не е само беззаконие – ова е казнување на културата. Бараме итна реакција Министерството за култура да постапува според закон, а не според лични инструкции“, рече потпретседателката на СДСМ Костова и дополни дека „вработените во културата заслужуваат достоинство, сигурност и почит и дека платата не е милостина туку право“.
ИЗВОР: racin.mk
