Во вчерашното издание на емисијата „Клик Плус“, претседателот на Алијанса за Албанците и актуелен министер за здравство, Арбен Таравари, говореше на неколку значајни теми поврзани со иднината на Македонија, вклучувајќи го евроинтегративниот процес, уставните измени, како и политичките коалиции меѓу албанските партии.
Таравари изрази задоволство од добрите односи на премиерот Христијан Мицкоски со САД. Сепак, посочи дека Мицкоски бара гаранција од Брисел и Вашингтон дека уставните измени ќе бидат последен услов на овој пат.
„Ако може да се најде решение за таа гаранција, која треба да ја дадат Брисел или Вашингтон… Мицкоски вели: ‘Да ги направиме уставните измени, бидејќи ги имаме бројките, но нивната примена да биде откако ќе станеме членка на ЕУ’“, изјави Таравари, додавајќи дека не станува збор за условување, туку за обид за осигурување на процесот.
Таравари се осврна и на можната консолидација на коалицијата ВЛЕН во една политичка партија. Тој нагласи дека Алијансата за Албанците е подготвена за соработка, особено на локалните избори, но се противи на ултиматуми и инсистира на отворен дијалог.
„Никогаш не сум функционирал со ултиматуми. Ако дојде до иницијатива за обединување, треба да има координација и транспарентен процес“, рече Таравари.
Во контекст на претстојните локални избори, Таравари изрази оптимизам за резултатите во општините Гостивар и Врапчиште. Тој смета дека со поддршка од неколку помали партии, победата е остварлива уште во првиот круг.
Таравари ја опиша коалицијата ВЛЕН како „чудо“ што го донесе обединувањето на албанската опозиција во Македонија.
„Тоа беше комбинацијата што никогаш претходно не се случила – сите опозициски партии да се обединат и да ја донесат промената кај Албанците“, изјави Таравари, потсетувајќи дека тие освоија 107 илјади гласови.
На крај, тој заклучи дека, доколку ДУИ сè уште беше на власт, ситуацијата денес ќе беше многу полоша.
ИЗВОР: ТВ 21
