КАЈСЕРИ (АА) – ТУНАХАН АКЃУН –
Фарук Јаман, 61-годишен вљубеник во пишаниот збор, кој живее во Кајсери, Туркије, ја претворил својата куќа во библиотека со повеќе од 70.000 книги што ги собира уште од детството, пишува Анадолу.
Јаман, кој гледајќи го својот татко се стекнал со навиката да чита книги уште во основното училиште, подоцна почнал да купува книги со парите што ги заработувал. Јаман ги купувал своите книги со години и создал лична библиотека со илјадници книги.
Со текот на времето, Јаман имал потешкотии во зачувувањето и одржувањето на книгите во својата куќа, па својата библиотека ја преселил во друга куќа во областа Меликгази.
Тој по работата го поминува своето слободно време во личната библиотека, ги споделува своите книги со истражувачи и академици. Во својата библиотека има повеќе од 70.000 книги.
Јаман во разговорот за АА изјави дека е сопственик на најголемата приватна библиотека во Туркије.
Тој истакна дека неговиот татко, кој бил добар читател, му оставил во наследство 10.000 книги.
Раскажувајќи дека во детството неговите врсници и постарите браќа читале книги и тоа е причината поради која се вљубил во книгите, Јаман истакна дека денес има многу книги и поради тоа има потешкотии да ги зачува.
Изјавувајќи дека со години купува книги на аукции и од препродавачи, тој рече дека има многу книги поврзани со градот и дека во неговата библиотека има многу значајни и ретки дела.
– „Ова место е поле со книги“ –
Посочувајќи дека книгите буквално се излеваат од кујната, дневната соба и собите од куќата, Јаман рече дека вратата на неговата библиотека е отворена само за историчари, истражувачи и академици.
Тој рече дека неговите книги се неговиот најголем извор на богатство:
„Што можете да направите со сите овие книги? Јас не можам да ги продадам. Книгите се дел од мене. Ова е мојот животен стил. Луѓето кои доаѓаат овде велат ‘мириса на книги’. Овој мирис може да го почувствувате кога ќе влезете во книжарници за стари книги. Ова место е како поле со книги. Првенствено, јас сум многу богат, моите 3 деца се образовани. Живеев со моите родители, имам среќно семејство. Од финансиски аспект, книгите се моето најголемо богатство. За моите книги дојдоа културни аташеа од 7 земји. Што може да е подобро богатство од ова? Од тој аспект, јас сум најбогат во Кајсери. Спортот, собирањето поштенски марки или музиката исто така можеа да бидат мое хоби. Во Туркије работам многу ретка и тешка работа.“
Раскажувајќи дека една соба од куќата ја посветил само на книги и документи поврзани со Кајсери, и дека таму има некои дела кои ги нема ни во библиотеките, Јаман рече дека внимателно се грижи за делата кои фрлаат светлина врз историјата и минатото на градот.
– Неговиот најголем страв се штетниците и стаорците –
Посочувајќи дека презел различни мерки на претпазливост за подобро да ги заштити своите книги, Јаман рече:
„Верувам дека нашиот најголем страв и опасност од зачувувањето на овие дела во иднина се стаорците и штетниците. Поголемиот дел од османлиските документи и книги што ги имам тука се изработени од хартија за јајца. Хартијата за јајца е одлична храна за нив. Од таа причина презедов секакви мерки за безбедност и дезинфекција. Пестицидите за штетници се достапни во форма на природни таблети, а имам и заштита во електронска форма. Инаку, во станот во кој се наоѓам има 16 внатрешни камери. Има месечни трошоци за компјутерите и интернетот. Годишно трошам 4.500 до 6.000 лири за контрола на штетници.“
– „Не знам колку книги сум прочитал, и не можам да го знам тоа“ –
Истакнувајќи дека книгите се најголемото културно богатство и врска со минатото, Јаман рече дека повеќето продавачи на стари книги и аукционери во Туркије го познаваат.
Тој рече дека досега прочитал илјадници книги:
„Не го знам бројот на книги што сум ги прочитал досега, а и не можам да го знам. И онака не е можно да ја прочитам секоја книга. Понекогаш читам одредени поглавја од книги, но во моите средношколски и факултетски години одев во многу библиотеки. Нема библиотека во Кајсери што не сум ја посетил. Бидејќи особено сум заинтересиран за собирање документи и артефакти поврзани со Кајсери, ми се јавуваат продавачите на стари книги и аукциски куќи од цела Туркије.“
Јаман додаде дека сам ја чисти и средува библиотеката, а најголема среќа му е разговорот меѓу книгите со неговите пријатели кои доаѓаат во неговата библиотека.
Извор: Anadolu Agency (AA)
