Поранешниот политичар, Тито Петковски во Аргумент плус рече дека иако новата влада во Македонија наметна перцепција дека САД е нашиот стратешки партнер до кој треба да се држиме, сепак не се знае каде и како ќе се рефлектира тоа. Според него, и политички и географски Македонија припаѓа во Европа но најважно е да се одреди по кој пат ќе се движи.
„Нема туку многу простор за мудрување, кога дојде новата власт наметнаа перцепција дека САД е наш стратешки партнер и дека треба да се држиме до нив, дури и коспонзорирањето на резолуцијата на САД според мене значеше обид на владата да се факторизира позицијата на Македонија во меѓународните односи и да се виде дека сме заедно. Се создава слика дека Македонија е некој фактор во меѓународните односи и политиката што ја следи САД е императив и тоа да се следи“, изјави Петковски.
Тој зборуваше и за тоа дека во моментов за Македонија најважно е да го собере цел свој потенцијал и да одлучи во која насока ќе се движи.
„Прашањето е кој пат да го фати Македонија, слепото придружување на САД за Македонија не е продуктивно, лошото минато со Европа, нашите луѓе гледаат со резерва на тоа Еу што бара од нас. Трамп вика дека договорот со Грција е еден од најудобрите што регионот ги заклучил а кого штити тука тоа е друго прашање. Ако сфатиме дека не сме никаков играч тоа е само бизнис. Во овој случај Македонија има обврска да седне и да го употреби цел свој потенцијал и да се види какви последици ќе имаме“, рече Петковски.
Според него помислата дека Трамп ќе го реши проблемот на Македонија со Бугарија е погрешна.
„Не верувам дека ќе има потези Трамп да го реши проблемот со Бугарија за таа да се повлече бидејќи тоа не е добитна карта. Неодамна Бугарија и САД склучија договор за испорака на авиони. Бугарија и плаќа на САД. Трамп е бизнисмен. Македонија треба да заборави дека некој ќе се жртвува за нас и ќе ја изгуби Бугарија“, додаде Петковски.
Извор: 24vesti.mk
