Француската актерка Жилиет Бинош ќе биде претседателка на жирито на 78. издание на Канскиот филмски фестивал, кој ќе се одржи од 13 до 24 мај. Ова е вторпат жена две години по ред да биде на чело на фестивалското жири, откако лани претседателка беше американската режисерка Грета Гервиг.
Легендарната француска глумица е ѕвезда на Кан низ годините. Таа првпат се појави на фестивалот пред 40 години, со премиерата на „Средба“ на Андре Тешине. Оттогаш уште многупати беше во Кан со нови филмови, како „Три бои: Синa“ на Кшиштоф Кишловски, „Скриено“ на Михаел Ханеке и „Сертификувана копија“ на Абас Кјаростами.
Бинош, актуелна претседателка на Европската филмска академија (ЕФА), е актерка, уметница и танчерка родена во Париз, која ги доби наградите Оскар, БАФТА, Европска филмска награда, Наградата на Здружението на филмски актери и Златниот глобус за улогата во филмот „Англискиот пациент“ од 1996. Бинош, исто така, е единствена жена што ги освоила признанијата за најдобра женска улога на сите три главни европски филмски фестивали – Златната палма во Кан за „Сертификувана копија“ (2010), актерската награда во Венеција за „Три бои: Сина“ (1993) и берлинската Сребрена мечка за „Англискиот пациент“ (1996).
„Во 1985 за прв пат чекорев по скалите со ентузијазам и неизвесност на една млада актерка. Никогаш не замислував дека ќе се вратам 40 години подоцна во почесната улога на претседателкa на жирито. Ја ценам привилегијата и одговорноста“, изјави Бинош.
Последен пат кога две жени беа последователни претседателки на жирито во Кан беше во 1966 година, кога Софија Лорен ја наследи Оливија де Хавиланд.
ИЗВОР: sdk.mk
