СДА Македонија изразува револт и жалење поради серијата дипломатски скандали и провокации кои го обележаа празнувањето на Денот на Св. Сава, празникот кој припадниците на српската заедница во Република Северна Македонија го слават.
Партијата реагира по последните настани, особено по средбата помеѓу вицепремиерот Стоиљковиќ и Милорад Додик, на која, освен државното знаме на Република Северна Македонија, било истакнато и знамето на еден од двата ентитета на Босна и Херцеговина.
Според СДА Македонија, ова дејство претставува поддршка на сепаратистичката политика на Додик, особено бидејќи тој беше неодамна подложен на санкции од САД и Велика Британија поради неговите обиди за нарушување на територијалниот интегритет на Босна и Херцеговина.
Од СДА Македонија истакнуваат дека на главната манифестација на Св. Сава, која се одржа под покровителство на Владата на РС Македонија, Милорад Додик испратил пораки со кои повторно го негирал геноцидот врз Бошњаците, осуден од Меѓународниот суд во Хаг. Партиијата смета дека ова е продолжување на неговите контроверзни ставови, особено кога станува збор за поддршката што ја добил од високи државни функционери, како што е вицепремиерот Стоиљковиќ.
„Наместо достоинствено одбележување на празникот, организаторите се одлучија за провокации преку негирање на геноцидот во Сребреница, како и за дипломатски скандали кои го нарушуваат односот помеѓу Северна Македонија и Босна и Херцеговина. Жалиме што Владата на РС Македонија, откако го запре патот кон ЕУ, станува покровител на настани кои го промовираат големосрпството и ја турка Северна Македонија во „српскиот свет“, на што вчера аплаудираше и рускиот амбасадор“, се вели во соопштението.
СДА Македонија ги повикува сите прогресивни политички сили и демократската јавност да се спротивстават на големосрпската политика, која е штетна за интересите на Северна Македонија и нејзините граѓани.
ИЗВОР: ТВ 21
