Постигнуваме успех. Непријателот е во дефанзива, тврди заменик-министерката за одбрана на Украина
Украина потврди дека почнала офанзивни акции на делови од фронтот и тврди дека остварила напредок кај разрушениот град Бахмут на истокот од земјата.
„Дефанзивната операција вклучува контраофанзивни акции. Со оглед на тоа, во некои делови водиме офанзивни акции“,
наведе заменик-министерката за одбрана на Украина, Хана Малијар, преку социјалната мрежа Телеграм.
Бахмут таа го опиша како „епицентар на непријателствата“.
„Ние тука напредуваме на прилично голем фронт. Постигнуваме успех. Непријателот е во дефанзива“,
вели Малијар.
Пред ваквите изјави на украинската функционерка, Русија соопшти дека одбила голема офанзивна акција на истокот и на југот на Украина, како и дека им нанела тешки загуби на Украинците во луѓе и опрема.
Киев претходно со месеци најавува и се подготвува за голема контраофанзива чија цел е да ги потисне руските трупи од зоните кои ги окупираа на украинска територија. Сепак, украинските власти не сакаа да откриваат ништо за своите планови или датуми.
Еден од градовите каде се водеа најжестоките битки е Бахмут, за кој во мај годинава руската паравоена група Вагнер соопшти дека успеала да го заземе после најдолгите и најкрвавите битни во оваа војна. Потоа, шефот на Вагнер, Евгениј Пригожин потврди дека украинските сили успеале да повратат дел од тамошната територија, односно делови северно од Бахмут.
Извор: 360stepeni.mk
