Расте бројот на жртви од земјотресите во Турција и Сирија: СЗО стравува дека билансот може драматично да се зголеми

Директно или индиректно, повеќе од 23 милиони луѓе би можеле да бидат погодени од катастрофалните земјотреси

Уште една студена ноќ во очајна трка со времето за да се спасат заробени луѓе под урнатините, поминаа спасувачките екипи во Турција и Сирија.

Последните информации од двете држави говорат дека повеќе од 7 800 луѓе загинаа во разорните земјотреси од понеделникот, а Светската здравствена организација (СЗО), пак, стравува дека црниот биланс може драматично да се зголеми бидејќи спасувачките екипи може да пронајдат уште голем број тела под урнатините.

Директно или индиректно, повеќе од 23 милиони луѓе, според прогнозите, би можеле да бидат погодени од катастрофалните земјотреси.

Анализа: Три клучни причини зошто земјотресот во Турција беше еден од најсмртоносните

Во извлекувањето на заробени лица и жртви од под урнатините учествуваат и роднини кои се приклучија на спасувачките екипи, а паралелно на помош во Турција пристигнуваат и тимови од голем број земји ширум светот.

Меѓу земјите кои испратија помош е и Северна Македонија од каде вчера 22 припадници на Баталјонот за специјални сили отпатуваа за Турција. Покрај нив, земјава испраќа и две кучиња обучени за трагање и двајца водачи.

Сали објави повик за здравствени работици од земјава кои сакаат да помогнат во Турција