АЛ-КУДС/ЕРУСАЛИМ (АА) – Израелската администрација оваа недела, како и минатата, воведе старосна граница за оние што сакаат да клањаат џума-намаз, петочна молитва на муслиманите, во џамијата „Ал Акса“, јавува Анадолу.
Израелската полиција и минатиот петок не им дозволи на многумина Палестинци да влезат во Стариот град, каде што се наоѓа „Ал Акса“.
Управата на исламски фондации на Ал-Кудс наведе дека израелските сили не им дозволуваат на мажите помлади од 65 и на жените помлади од 50 години да влезат во „Ал Акса“.
Израелската полиција постави барикади околу Стариот град во Источен Ал-Кудс/Ерусалим, кој ја вклучува џамијата „Ал Акса“, како и на влезната врата.
На некои Палестинци им е дозволен влез во „Ал Акса“ по проверка на идентитетот.
Хашим Таха, кој веќе 50 години е трговец во Стариот град, изјави дека Израел вовел старосна граница за Палестинците кои сакаат да клањаат во „Ал Акса“.
„Секогаш е исто, но овој пат му направија многу проблеми на палестинскиот народ и ако сакаат да одат во ‘Акса’ да се молат, таа е затворена за младите. Ниту тоа не е ништо ново, тие го прават тоа постојано“, изјави Таха.
Тој изјави дека улиците на Стариот град, низ кои минуваат илјадници луѓе секој петок, се празни.
„Тука повеќе нема работа бидејќи има војна. Единствената причина поради која ги отвораме нашите продавници е да им покажеме на народот и на израелската Влада дека сè уште сме на оваа земја. Нема да ја напуштиме оваа земја, нема да ги напуштиме нашите домови, работните места и улиците. Улиците на Стариот град во Ерусалим се празни бидејќи израелската Влада не им дозволува на луѓето да дојдат овде или во ‘Ал Акса’“, вели Таха.
Минатата недела беше објавено дека само 5.000 Палестинци може да клањаат џума-намаз во „Ал Акса“, каде што во просек се молат од 70.000 до 100.000 луѓе.
