Вучиќ за ситуацијата на Косово: Деца од 12, 13 години се подготвени да умрат поради Курти

Во врска со апсењето на тројца припадници на косовската полиција, за кои Србија тврди дека се специјалци уапсени на територијата на централна Србија, а Косово тврди дека се граничари кои биле зад административната линија, Вучиќ рече дека Курти со својата изјава признал дека биле таму каде што не смеело

Ситуацијата во Косово е „ужасно тешка“, децата на возраст од 12 и 13 години се подготвени да умрат, што мораме да го спречиме, на сите им е преку глава од косовскиот премиер Албин Курти, изјави денеска српскиот претседател Александар Вучиќ одговарајќи на новинарски прашања на заедничката прес-конференција со претседателката на Словенија Пирц Мусар.

„Не можам повеќе да издржам физички. Не можам да спијам ни една ноќ. Затоа што, за разлика од вас, знам што се случува секоја вечер на северот на Косово. Буквално сè врие. Децата од 12, 13 години се подготвени да умрат, што мораме да го спречиме. Доста им е од Курти“,

рече Вучиќ објаснувајќи дека претходната вечер деца на 12 и 13 години бркале возила на косовската полиција, пренесува Н1.

Во врска со апсењето на тројца припадници на косовската полиција, за кои Србија тврди дека се специјалци уапсени на територијата на централна Србија, а Косово тврди дека се граничари кои биле зад административната линија, Вучиќ рече дека Курти со својата изјава признал дека биле таму каде што не смеело.

„Важни се неколку работи, ако е точно сè што кажа Курти, тој самиот призна дека ги прекршиле сите норми на меѓународното право. Тој рече дека тие биле 300 метри во внатрешноста на административната линија. Немаат право да бидат таму. Според воено-техничкиот договор, тие треба да се јават на КФОР 36 часа порано за километар“,

рече Вучиќ.

Тој истакна дека припадниците на српската полиција и војска никогаш не ја преминале административната линија.

„Ако го прашате КФОР, ќе ви кажат дека Србија никогаш не го направила тоа“,

истакна Вучиќ.

Српскиот претседател посочи дека во утринскиот разговор со претставници на земјите од Квинтата им биле понудени сите докази за вчерашното апсење, како и дека лицата кои учествувале во апсењето се подготвени да направат полиграф.

„Јас понудив, не само да ги гледаме сите снимки (…) Ние сме подготвени да ги обезбедиме сите снимки. Им понудивме на лицата кои ги уапсиле да ги донесат своите полиграфски испитувачи со две прашања: ‘дали ги уапсивте овие лица’ и ‘дали ги уапсивте во централна Србија или на територијата на АП Косово и Метохија’ и сите лица се подготвени да одговорат на тие прашања“,

рече Вучиќ.

Според него, припадниците на косовската полиција не биле тепани или малтретирани по нивното апсење. Своето присуство на територијата на централна Србија, како што рече, го оправдувале со тоа дека бараат печурки, дека ГПС не им работи, дека не знаат да користат дурбин и двоглед.