Во Албанија се очекува дијаспората да има големо влијание на резултатите на парламентарните избори на 11 мај, доколку правото на глас го остварат сите оние на кои им е прифатено барањето.
За гласање се пријавиле над 294.000 лица, но повеќе од 48.000 барања биле одбиени, поради различни недостатоци, што значи дека треба да гласаат 246 илјади албански граѓани во странство.
Во тек е обработката на единствениот избирачки список од кого треба да бидат избришани лицата кои се пријавени за гласање од дијаспората.
– Гласачкото ливче ќе биде испратено на нивна домашна адреса во земјата каде живеат и работат, кои потоа треба да бидат вратени назад. Трошоците се на товар на Централната изборна комисија(ЦИК), за што се предвидени над 12 милиони евра. До крајот на следната недела се очекува да биде завршена процедурата за избор на операторот на поштенските услуги, потврди Илирјан Челибаши, претседател на ЦИК.
Доколку процесот се одвива според предвидените рокови, во периодот од 8 до 16 април се планира да заврши испраќањето на гласачките ливчиња.
Регистрацијата на гласачи од странство ги надмина првичните очекувања и на Централната изборна комисија и на самите политички партии. Барањата се од повеќе од 100 различни земји во светот, но над 60 отсто од регистрираните емигранти се од Италија (над 91 илјада) и Грција (над 68 илјади), каде што живеат најголемите заедници. На трето место со над 25.000 барања се оние од Германија, а потоа нешто повеќе од 20.000 од САД, објавија албанските медиуми.
Како што претходно соопшти албанското Министерство за внатрешни работи, во единствениот избирачки список се запишани 3.721.116 лица со право на глас.
Доколку се направи споредба со резултатите од пописот произлегува дека бројот на гласачи е поголем за 1.319.003 од бројот на жители, кој според пописните резултати изнесува 2.402.113 жители.
Извор: kurir.mk
