Премиерот Димитар Ковачевски задутре ќе поднесе оставка, а истиот ден се очекува тоа да го направи и првиот човек на Собранието Талат Џафери. Со ова целата влада ќе биде во оставка, па на Џафери ќе му се отвори патот да го добие мандатот за формирање на новата влада по моделот од Пржино.
ВМРО-ДПМНЕ сè уште не соопштува кои ќе бидат нивните двајца министри, но премиерот Ковачевски не прифаќа ВМРО-ДПМНЕ да гласа воздржано за техничкиот кабинет.
Ваквата упорност на партијата на премиерот Димитар Ковачевски доаѓа иако во 2016 година и тие самите не гласаа за техничката Влада. Имено и покрај тоа што предложија своите министри, СДСМ ја напушти седницата и не гласаше за кабинетот на Емил Димитриев во јануари 2016 година.
Сега Ковачевски не гледа сличност меѓу двете ситуации. Вели – сега условите биле сменети.
ВМРО-ДПМНЕ веќе најави дека ќе предложи свои министри, но нема да гласа „за“ Владата на Џафери бидејќи не се согласува со договорот меѓу СДСМ и ДУИ за премиер од ДУИ со мандат од 100 дена. Техничката влада инаку, треба да биде избрана на 28 јануари, 100 дена пред изборите кои се договорени за 8 мај.
Фатлуме Дервиши
Извор: alsat.mk
