Од МВР сè уште не потврдуваат дали Владата им го одбила предлогот за нов началник на СВР Тетово. За овој сектор долго време се шпекулираше дека постојат внатрешни судири. Но, техничкиот министер за внатрешни работи од ВМРО-ДПМНЕ, Панче Тошковски, има законско право да избере 15 позиции за распоредување на свои кадри. Тој рече дека Владата му одобрила 14 од 15 позиции. Едниот бил отфрлен без образложение.
Алсат упати и прашања до Владата. Сакавме да знаеме зошто на министерот Тошковски не му се одобрени сите 15 кадри и дали е точно дека му е одбиена токму началничката позиција на СВР Тетово. Сакавме да знаеме и која е причината за евентуалната таква одлука? Од Владата ни одговорија дека на отворената седница немало таква точка на дневен ред, а оти не може да се објават информации ако тоа се случило во затворената сесија.
Во меѓувреме, пред неколку дена, потпретседателот на ВМРО-ДПМНЕ, Александар Николовски, изјави дека местото началник на тетовската полиција, ќе биде избран кадар во координација со градоначалникот на Тетово, Биљал Касами.
Кадровски промени се законско право на техничкиот министер за внатрешни работи, за да обезбеди оперативно функционирање на министерството до изборите, односно сè додека му трае мандатот.
Фатлуме Дервиши
Извор: alsat.mk
