Известувачот на Европскиот парламент за Македонија, европратеникот Томас Вајц, пред Комитетот за надворешни работи на Европскиот парламент ќе го презентира нацрт-извештајот за напредокот на Македонија. Во него, меѓу другото наведува дека од суштинско значење за евроинтеграцијата на државата е сите политички актери, особено владата, да даваат опипливи резултати во клучните области, а во исто време Европската унија и нејзините држави-членки мора ги исполнат своите обврски.
Македонија моментно се наоѓа во тешка позиција бидејќи процесот на пристапување е сопрен. И покрај некои позитивни реформи, напредокот на реформската агенда на ЕУ, особено владеењето на правото, реформите во правосудството и борбата против корупцијата е недоволен, вели Вајц.
Известителот посочува дека не е постигнат напредок во однос на уставните измени поради загриженост за потенцијални дополнителни билатерални блокади или барања од Бугарија. Вајц смета дека е потребно и итно зголемување на политичката волја од двете страни за да се надмине овој ќор-сокак.
Извор: zurnal.mk
