АНКАРА (АА) – Палестинските деца и семејствата во Појасот Газа практично останаа без вода, објави Детскиот фонд на Обединетите нации (УНИЦЕФ) доцна синоќа, јавува Анадолу.
„Сега тие се принудени да користат нечиста вода од бунарите, со што се зголемува ризикот од болести што се пренесуваат преку вода. Потребен ни е итен хуманитарен прекин на огнот за да обезбедиме непречен и безбеден пристап до децата и семејствата во Газа“, соопшти УНИЦЕФ.
Газа се соочува со хуманитарна криза без струја, а останува и без вода, храна, гориво и медицински материјали. Цивилите бегаат на југ по израелското предупредување да ги евакуираат северните подрачја.
Борбите започнаа кога Хамас презеде повеќекратни ненадејни напади на 7 октомври, со голем број ракетни напади и упади во Израел по копно, море и воздух. Хамас рече дека операцијата била одмазда за претходните упади во џамијата „Ал Акса“ и зголеменото насилство од страна на израелските доселеници.
Израелската војска како одговор започна операција врз позициите на Хамас во Појасот Газа.
Најмалку 2.848 Палестинци, меѓу кои 750 деца, загинаа во израелските воздушни напади врз Газа, соопшти палестинското Министерство за здравство.
Во соопштението се наведува дека најмалку 10.859 Палестинци биле повредени во израелските бомбардирања.
Во Израел, во нападите од Газа загинаа околу 1.400 луѓе.
