ИСТАНБУЛ (АА) – Туркије денес го обвини Израел дека ги користи гладот и заразните болести како оружје против Палестинците во Газа, повикувајќи ја меѓународната заедница да преземе итни мерки за справување со влошената хуманитарна криза, јавува Анадолу.
„Последните случување во нашиот регион не треба да ја наведат меѓународната заедница да го игнорира геноцидот што Израел го врши во Газа“, се вели во соопштението на турското Министерство за надворешни работи.
Министерството ги критикуваше засилените напади на Израел врз цивилни цели, меѓу кои и училишта и бегалски кампови, во кои во последните денови се убиени стотици Палестинци.
„Исто така, употребата на гладот и на заразните болести од страна на Израел како оружје против палестинскиот народ преку спречување на обезбедувањето основни хуманитарни потреби во Газа не треба да го избегне вниманието на меѓународната заедница“, се додава во соопштението.
Потврдувајќи ја посветеноста на Анкара кон регионалниот мир, безбедноста и стабилноста, Министерството повика на итни мерки за решавање на кризата.
„Во овој контекст, го повторуваме нашиот повик за да се изврши неопходен притисок врз Израел, со цел да се обезбеди итен договор за прекин на огнот и непрекинат хуманитарен пристап до регионот“, се нагласува во соопштението.
„Ние ќе продолжиме да ги браниме правата на палестинскиот народ, меѓународното право и човековото достоинство“, се додава.
Израел од 5 октомври започна голема копнена операција во северниот дел на Газа, наводно, со цел да го спречи прегрупирањето на палестинската група на отпорот Хамас. Но, Палестинците го обвинуваат Израел дека сака да ја окупира областа и насилно да ги исели нејзините жители.
Оттогаш во областа не се дозволува влез на доволни количини хуманитарна помош – храна, лекови и гориво, оставајќи го населението таму на работ на неизбежен глад.
Во бруталната израелска војна во Појасот Газа досега се убиени над 45.000 луѓе, повеќето од нив жени и деца.
Извор: Anadolu Agency (AA)
