РАМАЛА (АА) – Телефонските и интернет-услугите денес почнаа постепено да се враќаат во Појасот Газа, соопшти палестинската телекомуникациска компанија „Палтел“, јавува Анадолу.
„Комуникациските услуги постепено се враќаат во различни подрачја на Појасот Газа откако беа отсечени од израелска страна“, се наведува во соопштението на компанијата.
Услугите беа прекинати вчера (недела), што е трет таков прекин од избувнувањето на конфликтот во Газа на 7 октомври.
Израелската војска започна воздушни и копнени напади врз Појасот Газа по прекуграничниот напад на Хамас на 7 октомври.
Најмалку 10.022 Палестинци, од кои 4.104 деца и 2.641 жена, се убиени во израелските бомбардирања врз Појасот Газа. Според официјалните податоци, бројот на загинати во Израел е речиси 1.600.
Покрај големиот број жртви и масовните раселувања, основните резерви се при крај за 2,3 милиони жители на Газа поради израелската опсада.
