Алијанса за Албанците мора конечно во текот на следната недела да одлучи како ќе се позиционира на мајските избори. Ова го најави првиот човек на партијата Арбен Таравари кој рече дека ќе ја почитува одлуката на партиските органи, каква и да е таа.
„Имаме одлука на раководството на партијата која е актуелна, но Собранието може да донесе друга одлука што мора да ја донесеме заедно. Што се однесува до претседателството, ние кажавме и не го криевме ставот. Немаше член на Алијанса на Албанците што не кажа дека имаме одлука од пред 3-4 месеци каде кажавме дека сами одиме на избори. Но, ќе ги видиме околностите, ќе ги слушнеме и препораките и на крајот ќе се донесе дефинитивна одлука на Собранието, можеби иста но може и поинаква. Ја почитувам одлуката на партиските органи, па што и да одлучи Собранието ќе постапам соодветно“, рече Арбен Таравари, претседател на АА.
Но, поранешниот прв човек на Алијанса за Албанците и актуелен претседател на Централното собрание Зиадин Села рече дека не се осмелува да зборува за што ќе се разговара и одлучува во Собранието. Села рече дека Собранието разговара за темите предложени од претседателот на партијата без да нагласи дали АА ќе одлучи или не на тој состанок како ќе се настапи на изборите. Самиот е на став дека треба да се натпреваруваат сами.
„Кога се ближат изборите мора да се свика Централното собрание. Имавме средба и на централното раководство на која разговаравме на оваа тема и во моментов имаме само една одлука, а тоа е одлуката на централното раководство Алијанса за Албанците да оди сама на избори. И во оваа дебата можам да кажам дека некаде околу 90% од учесниците, членовите на централното претседателство, се согласија со оваа одлука што ја донесовме“, рече Зиадин Села, претседател на Централното собрание на АА.
Дали Арбен Таравари, претседателот на партијата го дели ова мислење?
“Секако, тој ја водеше средбата на централното раководство“, додаде Зиадин Села, претседател на Централното собрание на АА.
Неофицијално се тврди дека во партијата имало поделени ставови – дали ќе се позиционираат со партиите од албанскиот опозициски блок, ќе се натпреваруваат заедно со таканаречениот европски фронт или ќе се натпреваруваат сами./Алсат.мк
Фатлуме Рушити
Извор: alsat.mk
