АНКАРА (АА) – Светската здравствена организација (СЗО) денеска предупреди на големата опасност од ширење болести во Појасот Газа во екот на израелската опсада и континуираните напади, пренесува Анадолу.
„Како што бројот на загинати и повредени во Газа продолжува да расте поради засилените непријателства, интензивната пренатрупаност и нарушените здравствени, водоводни и санитарни системи претставуваат дополнителен ризик за брзото ширење на заразни болести“, се вели во соопштението на здравствената организација на ОН на социјалната мрежа Х.
Од СЗО наведоа дека во Појасот Газа веќе се појавуваат загрижувачки трендови, вклучително и дијареја, бидејќи луѓето консумираат загадена вода.
„Ситуацијата е особено загрижувачка за речиси 1,5 милиони раселени луѓе низ Газа, особено оние кои живеат во пренатрупани засолништа без услови“, соопшти СЗО.
Се повикува на итен, забрзан пристап до хуманитарна помош за Појасот Газа, вклучувајќи гориво, вода, храна и медицински материјали.
Завојуваните страни се повикани да ги почитуваат своите обврски според меѓународното хуманитарно право за заштита на цивилите и цивилните инфраструктури.
