Националната метеоролошка служба извести дека рано утринава повеќе од 20 станици во повеќе делови од земјата забележале рекордно ниски температури за декември
Во Кина денеска се забележани нови рекордно ниски температури во услови на постојан студ во земјата на крајот на годината во која имаше голем број екстремни метеоролошки појави.
Националната метеоролошка служба извести дека рано утринава повеќе од 20 станици во повеќе делови од земјата забележале рекордно ниски температури за декември.
Во градот Хохот, главен град на провинцијата Внатрешна Монголија во северна Кина, на пример, живата падна на минус 29,1 Целзиусови степени.
Властите издадоа предупредување за ниски температури за големи области во северниот, источниот и југоисточниот дел на земјата.
Сегашниот студен бран следува по летото со рекордни жештини и разорни поплави, особено во северна Кина. Експертите предупредуваат дека глобалното затоплување, предизвикано од емисијата на стакленички гасови во атмосферата, доведува до зачестеност на овие екстремни појави.
Националната метеоролошка служба вчера соопшти дека пет станици во земјата регистрирале рекордно ниски температури, на пример, во северниот град Датонг, каде што е измерена температура од минус 33,2 Целзиусови степени.
Во северозападната провинција Гансу, каде што во понеделникот во земјотресот загинаа повеќе од 130 луѓе, преживеаните ја поминуваат ноќта завиткани во ќебиња во големите шатори обезбедени од спасувачките служби, обидувајќи се да останат на топло додека надвор е студено.
Во Шангај, најстудената зима во последните 40 години
Шангај ќе го забележи најстудениот декември во последните четири децении, што ги натера властите да издадат предупредувања за ниски температура и ветер.
Најниските температури во центарот на Шангај ќе се движат од минус 4 до минус 6 Целзиусови степени, додека во предградијата температурата цел ден ќе се задржи под нулата, соопшти Метеоролошкото биро на Шангај.
Метеоролошкиот завод на градот соопшти дека очекува минималната температура на една станица за читање во центарот на Шангај да остане под нулата пет последователни дена до 25 декември. Ваква студена зима Шангај не доживеал во последните 40 години.
Невообичаено студеното време, предизвикано од силниот бран студен воздух од Сибир, се прошири низ Кина од средината на минатата недела. Во исто време, многу северни провинции забележаа рекорди во декември, бидејќи во некои градови беа измерени минус 30 Целзиусови степени.
Извор: 360stepeni.mk
