ЏАКАРТА (АА) – Стотици илјади луѓе се собраа денес пред Националниот споменик во Џакарта, Индонезија, во знак на солидарност со Палестинците во екот на интензивните израелски бомбардирања на Појасот Газа, пренесува Анадолу.
Станува збор за најголем јавен собир во Индонезија од избувнувањето на војната меѓу Израел и палестинската група Хамас.
Облечени во бело и носејќи црно-бели палестински марами, насобраните виореа палестински знамиња и извикуваа „Господ е голем!“ и „Слободна Палестина“.
На собирот е упатен апел израелските сили да ја прекинат смртоносната опсада на Газа.
Додека снимки од бомбардирањето на Газа се менуваа на голем екран, говорниците на Плоштадот на Националниот споменик (Монас), повикуваа, меѓу другото, на бојкот на израелски производи и отворање на истрага за израелските дејствија во Газа од страна на Меѓународниот суд, пренесоа локалните медиуми.
Мирниот собир е организиран од страна на Индонезискиот Совет на улеми, нависоката исламска институција во земјата. Собирот е поддржан и од Владата, како и од бројни верски организации, вклучувајќи христијански и будистички.
Индонезија нема формални дипломатски односи со Израел и како силен поддржувач на Палестина, вакви собири не се невообичаени во земјата со мнозинско муслиманско население.
