БЕРЛИН (АА) – Воената алијанса НАТО се приклучи кон повиците за „хуманитарно примирје“ во конфликтот меѓу Израел и Хамас за да се дозволи клучната помош да влезе во Газа, јавува Анадолу.
Јенс Столтенберг, генерален секретар на Алијансата, за новинарите денес изјави дека НАТО ги поддржува дипломатските напори за постигнување хуманитарен прекин на огнот.
„Меѓународното право мора да се почитува, цивилите мора да бидат заштитени, а НАТО-сојузниците го поддржуваат хуманитарното примирје за да се овозможи помошта да стигне до Газа“, рече Столтенберг во Берлин пред билатералната средба со канцеларот Олаф Шолц.
„Страдањето на кое бевме сведоци во последните недели уште еднаш нѐ потсетува дека не смееме да се откажеме од работата за трајно, мировно, политичко решение“, рече Столтенберг.
Тој ги предупреди регионалните актери да не преземаат чекори што би можеле да предизвикаат поширок конфликт на Блискиот Исток.
„Војната во Газа не смее да се претвори во голем регионален конфликт. Иран и Хезболах мора да останат настрана од оваа борба“, нагласи тој.
Израел започна немилосрдни воздушни и копнени напади врз Појасот Газа по прекуграничниот напад на Хамас на 7 октомври.
Оттогаш загинаа најмалку 10.569 Палестинци, од кои се 4.324 деца, а 2.823 жени. Бројот на загинати во Израел порасна на речиси 1.600, според официјалните податоци.
Покрај големиот број жртви, масовните раселувања и илјадниците згради срамнети со земја, основните резерви се при крај за 2,3 милиони жители на Газа поради израелската опсада.
