Решението не е дефинитивно потврдено од партнерите во власта, но е најизвесната варијанта во овој момент на маса, додава изворот на ,,360 степени”. Со него би се постигнал баланс во распределбата на врвните функции во власта, ДУИ не би имала и премиер и претседател на парламентот во исто време, а во случај да не се избере шеф на државата, в.д. претседател би бил етнички Македонец
Талат Џафери од ДУИ да биде премиер на техничката влада сто дена пред избори, а Јован Митрески од СДСМ – нов претседател на Собранието. Ова, според извор на ,,360 степени” во владејачката коалиција, е најсериозната варијанта за спроведување на политичкиот договор постигнат меѓу Зоран Заев и Али Ахмети во 2020 година, во пресрет на парламентарните и претседателските избори в година.
Решението не е дефинитивно потврдено од партнерите во власта, но е најизвесната варијанта во овој момент на маса, додава изворот на ,,360 степени”. Со него би се постигнал баланс во распределбата на врвните функции во власта, ДУИ не би имала и премиер и претседател на парламентот во исто време, во случај да не се избере шеф на државата, в.д. претседател би бил етнички Македонец.
Досега јавно се појавија повеќе имињата на членови на ДУИ за потенцијален премиер на техничката влада меѓу кои не беше Талат Џафери, актуелниот претседател на парламентот. Јован Митрески, пак, кој е координатор на пратеничката група на СДСМ, при ваков можен расплет, се наметнува како логично решение за прв човек на Собранието.
В понеделник во Собранието ќе се одржи лидерска средба на која се очекува, меѓу другото, да се договори датумот, односно датумите за избори. Речиси извесно е дека на 8 мај ќе се одржат парламентарните и вториот круг од претседателските избори. Две недели претходно треба да се случи првиот круг од претседателската трка.
Се најавува и можност за укинување на институтот – техничка влада, со кој најголемата опозициска партија на сто дена пред изборите добива министри за внатрешни работи и за труд и социјална политика, како и дополнителни заменик-министри во неколку ресори со врзан потпис со министерот. Сепак, укинувањето не би важело за сегашните парламентарни избори, туку од тие по нив.
ИЗВОР: 360stepeni.mk
