ВРЕДИ молчи за ветото на Сиљановска Давкова за законот за детска заштита. Нема одговор од владиниот коалиционер ВЛЕН, откако шефицата на државата ја спушти рампата за двојазични лиценци во градинките – не го потпиша законот за детска заштита и го врати во Собрание на доработка.
Според образложението на Давкова, кое го објави МИА, се наведува дека спровела темелна анализа и експертски консултации, по што бара преиспитување на одредбите од членовите 9 и 10 од предлог-законот.
– Потсетувам дека начинот на употреба на македонскиот јазик и неговото кирилско писмо и јазикот што го зборуваат најмалку 20% од граѓаните и неговото писмо се веќе уредени со закон.
И додека од Илинденска бр2 порачуваат дека законот ќе се доработи и ќе се најде пред пратениците согласно законските рокови, првото вето на Сиљановска кое е тест за Собранието, ги подели и опозициските партии од македонскиот и албанскиот блок. Реагираа СДСМ и ДУИ. Првите го поздравија, вторите го оценија како отворен напад врз албанскиот јазик.
СДСМ го поздрави потегот и упати низа забелешки, во одреден дел идентични со оние кои шшто се наведени како причина за ветото.
– Членот 9 и членот 10… значи воведување двојазични лиценци од областа на детската заштита. Спорно е што овој сегмент е регулиран со друг закон кој ја уредува употребата на јазиците, но и Уставот на државата. Со предложените измени на Законот власта ги враќа процесите назад, со воведување можност за полагање за стекнување со лиценца во хартиена форма наместо во дигитална.
А ДУИ повика на мобилизација, порача дека е отворен напад врз албанскиот јазик и упати низа критики до коалицијата ВЛЕН.
– Ова е агресија против Албанците, во која ВЛЕН свесно ја презема улогата на соработник. Ова не е само удар врз јазикот – ова е обид за враќање на Албанците назад, за демонтирање на сите тешко стекнати права. Владата предводена од ВМРО-ДПМНЕ, со поддршка на ВЛЕН, покажува дека нема никаков интерес за соживот, туку следи реваншистичка, антиалбанска и опасна агенда.
Блокадата на Сиљановска ја поздрави Апасиев. Реагираше на фејсбук поставувајки реторичко прашање – дали апелот на пратениците Левица имало влијание врз одлуката на шефицата на државата. Тие реагираа и за тоа што измените на законот за заштита на децата, биле протуркани на комисијата за енергетика.
Инаку, според процедурата, доколку законските измени бидат повторно изгласани со 61 глас, претседателката е должна да го потпише Указот.
Извор: 24vesti.mk
