ВАШИНГТОН/ЊУЈОРК (АА) – Советот за безбедност на Обединетите нации (СБОН) синоќа по четврти пат оваа недела го одложи гласањето за нацрт-резолуцијата за хуманитарна помош за Појасот Газа, јавува Анадолу.
Се очекува 15-члениот Совет да се состане денес за да гласа за резолуцијата предложена од Обединетите Арапски Емирати (ОАЕ) која повикува на „итни чекори“ за да се овозможи безбедно и непречено доставување помош за погодените цивили во Газа.
Интензивните преговори зад затворени врати се водеа цела недела од страна на Советот за да се избегне американското вето.
По состанокот за ситуацијата на Блискиот Исток, американската претставничка во ОН, Линда Томас-Гринфилд, им рече на новинарите дека Советот е „подготвен“ да гласа за нацрт-резолуцијата.
„Само сакам да споделам со вас дека работевме напорно и вредно во текот на изминатата недела со Емиратите, со другите, со Египет, за да дојдеме до резолуција што може да ја поддржиме. И сега ја имаме таа резолуција“, рече таа, без да даде информации за тоа како ќе гласа.
Израел започна со жестоки напади врз Појасот Газа по нападот на Хамас на 7 октомври, при што според здравствените власти во енклавата загинати се над 20.000 Палестинци, главно жени и деца, а повредени се повеќе од 52.000.
Уништени се многу домови и друга инфраструктура, и има недостиг на храна, вода и лекови.
Израел соопшти дека 1.200 Израелци се убиени во нападот на Хамас од 7 октомври.
