Судијата го одложи неговото прво појавување пред суд до следната недела, објавува „Гардијан“.
Дејвид Раш, поранешен извршен службеник во Централната разузнавачка агенција (ЦИА), наводно зел 303 златни прачки, секоја со тежина од еден килограм, и повеќе од 2 милиони долари во странска валута.
„Помеѓу приближно ноември 2025 година и март 2026 година, Раш упатил повеќекратни барања до владата на Соединетите Американски Држави за исплата на значителни количини на странска валута и златни прачки во вредност од десетици милиони долари, сите за трошоци поврзани со работата“, напишал специјалниот агент на ФБИ, Метју Џонсон, во кривична пријава.
Во документот не е разјаснето што Раш имал намера да направи со златото и готовината, за кои беше утврдено дека недостасуваат од канцеларијата што ја користел во владиниот магацин. Раш беше уапсен минатата недела, а 35 луксузни часовници, повеќето од нив „Ролекс“, беа пронајдени при претрес на неговиот дом.
Обвинувања за фалсификување на биографии и измама
Иако е осомничен за голема кражба, формалното обвинение за кражба на јавни пари не се однесува на златните прачки, туку на обвинувањата дека Раш ги фалсификувал своите образовни квалификации и евиденција за воена служба за да се вработи во ЦИА во 2009 година. Според ФБИ, на овој начин тој обезбедил „овластување за пристап до доверливи и чувствителни информации“.
Раш, исто така, наводно извршил измама со работно време и присуство. „Откако бил почесно отпуштен од војската во февруари 2015 година, Раш прикажал 744 часа воено отсуство во своите официјални евиденции за работно време, за што му биле платени приближно 77.000 долари“, изјави Џонсон.
Тој додаде дека Раш ја напуштил морнарицата со чин поручник, но во резервата на морнарицата се претставил како капетан и лажно тврдел дека бил пилот на морнарицата.
Заедничко соопштение на ЦИА и ФБИ
Во заедничко соопштение на ЦИА и ФБИ се вели дека Раш е уапсен на 19 мај. „Откако внатрешната истрага на ЦИА откри можни прекршувања на законот, директорот на агенцијата Џон Ратклиф го упати случајот до ФБИ за понатамошна истрага“, се вели во соопштението на „Њујорк тајмс“.
На Раш му е одбиено ослободување со кауција, а судијата Вилијам Фицпатрик во четврток се согласи да го одложи рочиштето за притвор до 5 јуни.
Извор: Индекс.хр
Извор: vecer.mk
