Утре се очекува Владата, како што веќе најави, да ги разреши директорите и Управниот одбор на М-НАВ по тензиите и скандалите во последните неколку дена. Првиот човек на синдикатот на вработените во Македонската навигација утрешниот ден го смета за клучен.
„Утре е денот „Д“ за М-НАВ. Или директорите ќе бидат разрешени или контролата на летање ќе го затвори воздушниот простор над Скопје. Се надеваме дека сето тоа што се случи ќе резултира со разрешување на директорите во М-НАВ. Во спротивно и во Владата ќе покажат дека не им е битно ништо освен фотелјите“ рече Александар Тасевски, раководител на Синдикатот на вработени во М-НАВ.
Доколку директорите не бидат разрешени, првиот човек на синдикатот Тасевски во изјава за Дојче веле најави дека не им преостанува ништо друго освен од среда на 10 јануари да престанат да работат, а со тоа ќе нема ниту полетувања, ниту слетувања во главниот град. Тоа ќе трае сè додека не се исполнат нивните барања. Директорите самите не сакаа да си поднесат оставки.
Сето ова се случува по тензиите во Македонската навигација кои ескалираа со напад на институцијата на 4 јануари кога беа нападнати тројца вработени. Нападот дојде откако синдикатот на прес-конференција алармираше дека се под зголемен притисок од челниците на М-НАВ поради нивното негодување за новите планирани вработувања.
Во нападот беше вклучен и функционерот на ДУИ, Беким Незири, кој со години е вработен во М-НАВ, како и уште седум други лица. Ним судот им изрече мерки на претпазливост до расчистување на случајот, но четворица од напаѓачите се во бегство.
Од ВМРО-ДПМНЕ велат дека партизираното судство и институциите раководени од партиски кадри на СДСМ и ДУИ се опасност за граѓаните.
Незадоволството во М-НАВ трае подолго време. Синдикатот неколку пати алармираше дека се вработуваат несоодветни партиски и нестручни кадри, поради што побараа сериозна реформа во службата и подобрување на условите за работа./Алсат.мк
Фатлуме Дервиши
Извор: alsat.mk
