ЖЕНЕВА (АА) – Швајцарскиот Парламент денес усвои закон со кој е незаконско покривањето на лицето, вклучително и носење бурка – муслимански женски превез што го покрива целото тело од глава до пети – со парична казна од 1.000 швајцарски франци (околу 1.114 долари), пренесува Анадолу.
Законот за „забрана на бурка“ беше одобрен од Горниот дом на Парламентот, познат како Националрат, со 151 глас „за“ и 29 „против“, објави јавниот сервис „СРФ“.
Сите барања на пратениците за измени во формулацијата, висината на паричните казни и изземањата беа одбиени.
Швајцарската Влада во 2021 година спроведе референдум за ова прашање, при што 51,2 отсто гласаа за забрана за носење бурка на јавни места во целата земја, а 48,8 отсто гласаа против.
Новиот закон го прави незаконско покривањето на лицето на јавни и приватни места достапни за пошироката јавност „на таков начин цртите на лицето да не се препознатливи“.
На прекршителите им се заканува казна до 1.000 швајцарски франци (1.114 долари). Сепак, постојат неколку исклучоци од забраната, како верските служби, автохтони обичаи, театарски претстави и превез од здравствени или климатски причини.
Новиот федерален закон ги замени локалните закони во 15 швајцарски кантони што забрануваат покривање. Франција и Белгија беа први земји во Европа што ја забранија бурката на јавни места во 2011 година, потоа Бугарија во 2016 година, Австрија во 2017 година и Данска во 2018 година.
