Музејот во Штип грижливо го чува пронајдениот камен на кој се испишани глаголични букви, по истражувањата на познатиот македонски архелог Блага Алексова извршени пред 4 децени и истражувањата на штипските архолози започнати пред две години. Музејот изготвува проект за комплетно уредување на археолошкиот локалитет „Кале“ кај селото Крупиште на површина од 8 хектари и негово ставање во туристичката мапа на Македонија.
„На овој локалитет веќе се работи на конзервација на откриена ранохристијанска базилика, но сите досегашни истражувања говорат дека на овој простор среде оризови полиња се наоѓаат повеќе од десет такви цркви каде е пронајден и каменот со глаголичните букви. Веќе имаме проекти за разработка и натамошни истражувања на целата локација со кои догодина ќе конкурираме пред Министерството за култура за нивно одобрување, но со оглед на тоа што се неопходни големи финансии ќе бараме донатори и други извори на средства“, вели директорот на НУ Завод и Музеј Штип, Митко Штерјов.
Според Штерјов, во наредниот период во соработка со националните установи и Општината Карбинци во која се наоѓа локалитетот „Кале“ кај селото Крупиште, ќе се врати и каменот со глаголичните букви што сведочи за тоа дека на овие простори многу одамна постоела писменост. Истовремено, ќе се работи и за наоѓање и трасирање пристапни патишта и ќе се постави сета неоходна сигнализација за да може целиот археолошки комплекс да биде достапен и дури тогаш да биде ставен во туристичката карта на Македонија.
Во Музејот во Штип, заедно со каменот на глаголицата се чуваат и црковни книги стари по неколку века и сите се дел од новата изложбена поставка.
Т. ЈОВАНОВСКИ
ИЗВОР: sdk.mk
