ОВИЕДО (АА) – По неколкудневни тензични дебати и протести, шпанскиот Парламент денес го реизбра Педро Санчез за премиер, овозможувајќи му да формира функционална Влада, јавува Анадолу.
Социјалистот Санчез ќе ја предводи прогресивната коалициска Влада заедно со левичарската партија Сумар, партнерство што ја води Шпанија од јануари 2020 година.
Од 350 члена на шпанскиот Парламент, 179 гласаа за Владата на Санчез, а 171 гласал против.
Без мнозинство, левичарската коалиција мораше да им се додворува на гласовите на регионалните партии од цела Шпанија. Владата беше поддржана и од шест други партии во поделениот Парламент на Шпанија – Републиканската левица на Каталонија (ЕРК) и Заедно за Каталонија; Баскиската националистичка партија (PNV) и баскиската партија ЕХ Билду; Галицискиот националистички блок (BNG) и Канарската коалиција од Канарски Острови.
Една од најконтроверзните отстапки за регионалните партии беше договорот склучен со каталонските сепаратисти за амнестија на вклучените во каталонското движење за независност. Во наредните месеци пратениците треба да го изгласаат законот за амнестија, иако опозицијата ќе го оспори на суд.
Договорот за амнестија предизвика гнев низ Шпанија. На улиците низ земјата излегоа стотици илјади демонстранти против договорот, а вечерните протести на екстремно десничарските активисти станаа насилни.
Пред денешното гласање демонстрантите се собраа околу Парламентот во знак на протест, некои фрлаа со јајца кон политичарите социјалисти.
За време на денешниот говор во Парламентот, портпаролката на социјалистите, Патси Лопез, ја предупреди шпанската конзервативна Народна партија за опасностите од подбуцнување на населението со хиперболи и говор што го обвинува Санчез за уништување на демократијата.
„Ако продолжите да го храните ѕверот, тој ќе ве проголта… можеби мислите дека ги напаѓаат социјалистите, но тие ја напаѓаат демократијата“, рече таа.
Шпанската крајно десничарска партија Вокс повика на „перманентни мобилизации“ против „нелегалната влада“, за која вели дека го уништува шпанското единство и го еродира владеењето на правото.
Народната партија, исто така, поддржува уште еден протест што може да прерасне во масовен, во сабота, против амнестијата.
Вчера Санчез вети неколку мерки за неговата претстојна администрација, меѓу кои и признавање на палестинската држава, продолжување на даночните намалувања на прехранбените производи, бесплатен јавен превоз за младите и невработените и задржување на данокот за богатите.
Шпанските гласачи излегоа на гласање кон крајот на јули, а земјата беше без функционална влада повеќе од 115 дена.
