Шилегов предлага во мај идната година, кога ќе се одржат парламентарните и вториот круг од претседателските избори, да се одржат и избори за нов градоначалник на Град Скопје
Претседателката на Либерално-демократската партија, Моника Зајкова, пак, најави дека партијата започнува граѓанска иницијатива за отповикување на градоначалниците преку измени на Законот за локална самоуправа
Поранешниот скопски градоначалник Петре Шилегов синоќа во објава на Фејсбук ѝ порача на неговата наследничка, актуелната градоначалничка Данела Арсовска, да си поднесе оставка од функцијата, оценувајќи оти главниот град се наоѓа во, како што вели, процес на целосна девастација.
Шилегов предлага во мај идната година, кога ќе се одржат парламентарните и вториот круг од претседателските избори, да се одржат и избори за нов градоначалник на Град Скопје.
„Почитувана Арсовска, заминете си, поднесете оставка. Доблесно е да си признаете дека сте тотално неспособна и некадарна да го водите градот. А едноставно, градот Ви се случи – непланирано. Без визија и план што би работеле. Со сите мои и наши (партиски, политички и граѓански) грешки кои придонесоа за тоа)“,
пишува ексградоначалникот на Скопје.
Во објавата, Шилегов додава оти нема намера, ниту, пак, носталгија за враќање на градоначалничката функција.
Кога е предвиден престанок на мандатот на градоначалникот
Престанок на градоначалничкиот мандат, вклучувајќи го и оној на градоначалникот на Градот Скопје, е предвиден во Законот за локална самоуправа. Таму, јасно е наведено дека мандатот на градоначалникот престанува по сила на закон доколку самиот поднесе оставка. Негово отповикување од функцијата не е можно.
Мандатот на градоначалникот може да престане и во случај на смрт, ако со правосилна пресуда е осуден за кривично дело на казна затвор во траење над шест месеци, ако со правосилно решение биде лишен од деловна способност, ако настапи случај на неспоивост за вршење на функцијата согласно со Законот за локални избори, во случај на неоправдано отсуство подолго од шест месеци и ако престане да биде жител на општината.
ЛДП најави иницијатива за отповикување на градоначалниците преку законски измени
Оценувајќи оти „граѓаните не смеат да трпат заради неспособноста на локалните власти“, претседателката на ЛДП, Моника Зајкова, најави дека партијата започнува граѓанска иницијатива за отповикување на градоначалниците преку измени на Законот за локална самоуправа и собирање потписи за референдум.
Оценува оти она што се случува во Скопје е знак дека мора да има механизам за отповикување на градоначалниците, а оти целта на ваквата иницијатива е создавање поспособна и проактивна локална самоуправа.
„Се наоѓаме во ситуација во која градоначалниците буквално можат да ги поминуваат своите мандати без реална одговорност и отчетност за нивното (не)сработено, а од тоа страдаат општините и граѓаните. Ги повикуваме сите заинтересирани граѓани да се приклучат кон оваа иницијатива, заедно да работиме на создавање на отворен и одговорен систем на локално самоуправување во Скопје и во целата земја“,
пишува Зајкова во објава на социјалните мрежи.
ИЗВОР: 360stepeni.mk
