Се трага по уште едно лице – возачот на „аудито“ што вчера падна во Вардар

Вчера попладне на локалниот пат за село Рашче патничко возило излетало од патот и паднало во Вардар.

Во подоцните вечерни часови  е извлечено возилото кое попладнето излета во Вардар во близина на село Рашче и од него се извадени тела на три женски лица. Потрагата по четврто машко лице кое најверојатно излетало од возилото во водите на Вардар продолжува, соопшти синоќа директорот на Центарот за управување со кризи (ЦУК) Стојанче Ангелов.

Претходно, случајни минувачи на патот пронашле четиригодишно дете и го пренеле  во ГОБ „Св. Наум Охридски“ кое потоа е пренесено во Клиничкиот центар во Скопје, а од таму соопштија дека детето е во стабилна здравствена состојба и дека ќе биде под медицински надзор поради начинот на кој се случила несреќата.

Министерството за внатрешни работи соопшти дека се преземаат мерки за пронаоѓање на уште едно лице, кое според исказ од роднини, го управувало возилото „ауди“ што вчера падна во водите на Вардар откако излетало на локалниот пат за село Рашче.

За сообраќајната несреќа во СВР Скопје било пријавено вчера во 16 часот. МВР информира дека веднаш на местото на настанот биле упатени полициски службеници и Итна медицинска помош, како и јавен обвинител.