Спротиставувањето во Алијанса за Албанците, продолжи и денеска. Алсат објави фотографии на кои се гледа како членови на ограноците во Чаир, Чучер Сандево, Арачиново, Куманово, Липково, Сарај, Тетово, Кичево, Гостивар, Долнени, Зелениково и други, се потпишуваат на петицијата за поддршка на шефот на Алијансата за Албанците Арбен Таравари, и неговиот став за предизборна коалиција со албанската опозиција.
Притоа, Таравари на социјалните мрежи објави и изјава на членовите на Академијата на АА во знак на поддршка.
„Сега кога Северна Македонија оди кон нови избори, имаме единствена можност за голема политичка промена. Консолидацијата на албанската опозиција, поддржана од премиерот на Косово, Албин Курти, е знак за победата на Албанците“, се вели во соопштението потпишано од Халил Снопче, Агрон Рустеми, Арбен Фетаи, Ариф Селмани, Азир Алиу итн.
Алиу е еден од двајцата министри кои излегоа со поддршка за Таравари. Тој и министерот за здравство Фатмир Меџити може да се соочат со последици поради поддршката на партискиот лидер. Одговорност за нив најави и првиот човек на Централното собрание на АА Зијадин Села.
„Дојде време Алијанса за Албанците да се врати на своите корени. Имињата што ги спомнавте се туѓи, ние ги прифативме со раширени раце, но тие беа дојдени со туѓи намери. Ова нема да го толерираме. Кога не знаеш каде ти е местото во новата куќа во која си дошол, должност е да ја напуштиш куќата“, рече Зијадин Села, претседател на Централното собрание на АА.
Запрашани денеска од Алсат за нивно можно разрешување, министрите Алиу и Меџити решија да не коментираат.
Во сабота, на Централното собрание се очекува Алијанса за Албанците да расправа за единствената точка на дневниот ред, одговорност за лидерот Таравари. Откако Таравари излезе во јавноста и ги повика партиските органи да се определат за промени, од дел од функционерите беше обвинет дека ги саботира органите, и оти не ги информирал за понудите за коалиции и не ги следел процедурите според статутот.
Статутот на Алијанса за Албанците предвидува дека претседателот на партијата се разрешува на Конгрес со 2/3 од присутните делегати а иницијативата за престанок на мандатот на претседателот ја иницираат две третини од членовите на партиското собрание.
Централното собрание на АА има вкупно 133 членови а Таравари тврди дека има поддршка од 80 од нив./Алсат.мк
Фатлуме Дервиши
Извор: alsat.mk
