Разговори има, но финален договор нема – вели претседателот на СДСМ, Димитар Ковачевски во однос на евентуалните предизборни заеднички листи со ДУИ и останатите партии од коалицијата. Ковачевски вели дека се разговара со сите кои, како што рече, споделуваат визија за членство на Македонија во ЕУ. Тој додаде дека неговата партија веќе го формирала изборниот штаб, а за исход од разговорите со останатите партии било рано бидејќи изборите сè уште не се распишани.
„Тече и постапката за кандидирање на кандидати за претседател на државата, на кандидати за пратеници и којашто се одвива согласно динамиката усвоена согласно Правилникот и роковникот од Централниот одбор“, рече Ковачевски.
Во меѓувреме, од партијата на Ковачевски го обвинија ВМРО-ДПМНЕ дека, како што наведоа, седеле во техничката влада предводена од Џафери, а се прават дека не се дел од неа. Според социјалдемократите, лидерот на опозицијата Христијан Мицкоски немал ниту став, ниту капацитет да донесе некаква одлука.
Од друга страна, ВМРО-ДПМНЕ обвини дека со техничката Влада еден криминалец бил заменет со друг. Според опозиционерите, СДСМ им ја дала Македонија на подарок на ДУИ и Ахмети.
„На понижувањата на Ковачевски во желбата за власт им нема крај. Тој го моли командант Форина и Ахмети да му го поддржат Стево Пендаровски и да имаат заеднички листи. Ковачевски за власт дава сè. Со Ковачевски, СДС и ДУИ, Македонија секој ден ја има сè помалку“, рече Миле Лефков – пратеник на ВМРО-ДПМНЕ.
Од партијата на Мицкоски критикуваа и дека пратениците на СДСМ го изгласале Џафери за премиер, иако претходно најавувале дека нема да гласаат за техничка Влада која нема да добие поддршка и од ВМРО-ДПМНЕ.
Лука Андреев
Извор: alsat.mk
