ИСТАНБУЛ (АА) – Рускиот министер за надворешни работи, Сергеј Лавров, утре ќе престојува во официјална посета на Анкара, соопштија дипломатски извори, јавува Анадолу.
Во рамки на посетата, Лавров и неговиот турски колега Хакан Фидан ќе разговараат за билатералната соработка, особено во полето на трговијата, енергетиката и туризмот.
Министрите за надворешни работи ќе разменат мислења и за ставањето крај на војната во Украина со праведен и траен мир преку дипломатски напори и ќе разговараат за неодамнешните контакти меѓу САД и Русија и придонесот на Туркије во овој процес.
На средбата ќе биде нагласена и подготвеноста на Туркије да биде домаќин на идните разговори меѓу Русија и Украина, исто како што беше во март 2022 година.
Регионалните и глобалните прашања, меѓу кои и Сирија и Блискиот Исток, исто така ќе бидат тема за време на разговорите, соопштија изворите, додавајќи дека Фидан ќе ја истакне одлучноста на Анкара за целосното чистење на Сирија од терористичките елементи и ќе ја нагласи важноста од зачувување на територијалниот интегритет и политичкото единство на Сирија.
Турскиот министер Фидан ќе потсети дека агресивниот пристап на Израел кој го загрозува територијалниот интегритет на Сирија е неприфатлив, а исто така ќе нагласи дека започнувањето на работите на обновата е неопходно за стабилноста на Сирија.
Фидан ќе посочи и дека прекинот на огнот во Газа мора да биде траен и да се зголеми хуманитарната помош за Газа. Тој, исто така, ќе нагласи дека присилното раселување на Палестинците од нивната татковина е неприфатливо.
Мирот на Блискиот Исток може да се постигне само врз основа на дводржавното решение, ќе повтори Фидан за време на разговорите.
Лавров последен пат ја посети Туркије на 18 октомври минатата година, како дел од состанокот на Регионалната платформа за соработка 3+3.
Фидан и Лавров последен пат се сретнаа на 20 февруари во Јоханесбург на маргините на состанокот на министрите за надворешни работи на Г-20.
Извор: Anadolu Agency (AA)
