МОСКВА (АА) – Рускиот претседател Владимир Путин денес оствари телефонски разговор со азербејџанскиот претседател Илхам Алиев за овонеделната авионска несреќа на „Азербејџан ерлајнс“ во Казахстан и упати извинување и сочувство, пренесува Анадолу.
„Владимир Путин се извини за трагичниот инцидент што се случи во рускиот воздушен простор и уште еднаш изрази длабоко и искрено сочувство до семејствата на жртвите и им посака брзо закрепнување на повредените“, се вели во соопштението на Кремљ.
Путин истакна дека азербејџанскиот патнички авион направил повеќе обиди за слетување во градот Грозни, Чеченија, во време кога руските системи за противвоздушна одбрана активно реагирале на напад со украински дронови.
Тој му рекол на Алиев дека Рускиот истражен комитет покренал случај според член 263 од Кривичниот законик, кој опфаќа прекршување на правилата за безбедност и работа во воздушниот сообраќај.
„Во тек се прелиминарните истражни дејствија, во рамките на кои се вршат консултации со цивилни и воени експерти“, се додава во соопштението.
Во средата, авион на „Азербејџан ерлајнс“ при лет од главниот град на Азербејџан, Баку, за Грозни, се урна во близина на градот Актау во Казахстан, при што загинаа 38 лица, а меѓу вкупно 67-те во авионот, а преживеаја 29.
Двајца претставници на азербејџанското Главно обвинителство во моментов се во Грозни и соработуваат со руски претставници од Канцеларијата на Генералното обвинителство и Истражниот комитет.
Различни служби од Русија, Азербејџан и Казахстан тесно се координираат на местото на несреќата во близина на Актау за санирање на последиците од катастрофата.
Извор: Anadolu Agency (AA)
