Правецот на македонската надворешна политика е јасен – стратешко партнерство со САД, члентвото во НАТО и останување на патот кон неостварената стратешка цел – полноправното членство со Европската Унија, брифираат извори од МНР.
Во однос на гласањето на воздржаност во Обединетите нации за резолуциите за Украина, велат дека земјава успеала да одржи позиција којашто истовремено е и принципиелна и во рамки на трите приоритети на нашата надворешна политика – членството во НАТО, усогласеноста со заедничката надворешна и безбедносна политика со ЕУ и нашето формално стратешко партнерство со САД.
Велат дека пред да се донесе одлуката, имале сериозни консултации и голем број анализи, и оти со тоа не е променето ништо во усогласеноста со заедничката надворешна и безбедносна политика на ЕУ. Дополнуваат дека е гласано за принципиелна политика што била договорена меѓу коспонзорите, а тоа значи дека било кое видоизменување на резолуцијата значело дека државава ќе гласа воздржано по однос на таа резолуција.
Во однос на честата динамика на посети во САД, изворите велат дека зачестените посети на официјални претставници на Владата во САД, е во насока на зајакнување на билатералните односи, но, велат тие, и поради фактот што ние се уште не можеме да почнеме преговори со ЕУ и улогата на новата администрација во тој процес.
Изворите од МНР, кои инсистираат на анонимност, изразуваат уверување дека сите предизвици што ги има трансатлантското партнерство за некој период пак ќе се надминат и оти затоа ние ќе се поставиме одејќи по нашиот интерес, а клучна неостварена политичка цел за која активно се работи во последниот период е полноправното членство во ЕУ, односно отпочнување на процесот на преговори со ЕУ и оти тој дијалог никоаш не е застанат.
Истите извори додаваат дека државава не е подготвена во овој момент да испраќа војници во Украина и оти во моментов како земја-членка на НАТО не смееме да дозволиме било каков безбедносен вакуум од регионална гледна точка, и додаваат дека нашиот фокус во следниот период мора да биде на нашиот регион и на источното и јужното крило на НАТО.
Изворите од МНР ја повторија државната позиција дека Русија спровела воена агресија врз Украина, но истовремено, додаваат оттаму, сметаат дека е дојдено време за дипломатија и за мир и оти принципиелно ќе поддржуваат секоја иницијатива што е насочена кон изнаоѓање на мир.
Извор: 24vesti.mk
