Судските процеси поврзани со трагедијата во дискотеката „Пулс“ во Кочани влегуваат во нова фаза, со повеќе паралелни постапки и вкупно 25 обвинети полициски службеници. Наместо една заедничка постапка, Обвинителството одлучи одговорноста на полицијата да ја утврдува преку три различни обвиненија и три одвоени судски процеси.
Овие постапки ќе се водат паралелно со таканаречениот „главен процес“, во кој на обвинителна клупа се најдоа 35 цивилни лица и три компании поврзани со работењето на објектот. Со тоа, случајот што веќе се смета за еден од најкомплексните во поновата македонска историја се претвора во мрежа од повеќе судски предмети со различни квалификации и различни линии на одговорност.
Првиот судски процес започна на 3 март и во него се обвинети тројца полициски службеници. Според обвинението, тие сториле злоупотреба на службената положба при составување службени записници, внесувајќи неточни податоци со што биле искривени фактичките состојби за прекршувањата во објектот. Сите тројца се изјаснија дека не се чувствуваат виновни.
Вториот процес треба да започне на 5 март и опфаќа девет полициски службеници. Тие се обвинети дека во периодот 2022–2023 година не извршиле целосни проверки при давање согласности за работа на објектот, со што, според обвинението, му овозможиле на правното лице да стекне противправна имотна корист.
Третиот и најобемен предмет опфаќа 13 полициски службеници. Тие се гонат за потешки кривични дела против општата сигурност како соизвршители, поврзани со нивното постапување во ноќта кога се случил трагичниот настан. Според обвинението, тие не презеле соодветни мерки за заштита на присутните и не ја спречиле употребата на пиротехника, иако била во тек полициска контрола во објектот. Обвинителниот акт за оваа група веќе е одобрен од Основниот кривичен суд Скопје.
Поделбата на случаите против полицајците на три посебни постапки отвора сериозни прашања во јавноста и правната фела. Додека за полициските службеници обвиненијата се раздвоени според различни периоди и дејствија, главниот предмет против цивилните лица и компаниите останува обединет во едно големо обвинение.
Правните експерти предупредуваат дека ваквата конструкција може да го отежни докажувањето на индивидуалната одговорност во главниот процес, бидејќи во истиот предмет се вклучени лица со сосема различни улоги – од сопственици на фирми и институции до инспекциски структури и поранешни функционери.
Со новите обвиненија, судскиот систем ќе се соочи со најмалку четири паралелни процеси поврзани со трагедијата во Кочани. Според правните експерти, тоа значи голем број докази, сведоци и приговори, што може значително да го продолжи времетраењето на постапките.
Адвокатот Петре Шилегов на едно од претходните рочишта предупреди дека обвинителството треба внимателно да утврди за кои лица може да се води постапка за загрозување на општата сигурност, наместо обвинението да се поставува на широк принцип на колективна одговорност.
Трагедијата во дискотеката „Пулс“ веќе се смета за вистински тест за правосудниот систем. Наместо еден централен процес, сега се водат повеќе судски постапки со различни правни квалификации и различни фактички основи – од настаните во објектот во критичната ноќ, преку административните процедури во претходните години, до службените документи и записници.
Токму ваквата структура на предметите создава стравување дека судските процеси може да се претворат во долготраен маратон, додека јавноста и семејствата на жртвите сè уште очекуваат брза и јасна правда.
Извор: zurnal.mk
