Ова ги наруши новогодишните планови на илјадници патници. „Еуростар“ прво откажа 14 возови, а потоа реши да ги откаже сите, вкупно 41, бидејќи водата во тунелите не се повлекла
Поради поплавените железнички тунели во југоисточна Англија, денеска беа откажани сите возови што го поврзуваат Лондон со европското копно, објави меѓународниот железнички оператор „Еуростар“.
„Еуростар“ оперира со возови кои го поврзуваат Обединетото Кралство со континентална Европа преку Евротунелот.
„Возовите се откажани денеска бидејќи дел од пругата е привремено затворена во близина на Лондон“,
објави „Еуростар“ на социјалните мрежи, извинувајќи се на патниците и нудејќи веб-страница за информации за статусот на линиите.
Ова ги наруши новогодишните планови на илјадници патници.
„Еуростар“ прво откажа 14 возови, а потоа реши да ги откаже сите, вкупно 41, бидејќи водата во тунелите не се повлекла.
Не е познато што ги предизвикало поплавите во железничките тунели под реката Темза во близина на Ебсфлит, источно од Лондон.
Делови од Англија беа погодени од силен дожд во последните денови.
На југот на Англија е прогласена жолта опасност поради силниот ветер.
Видео снимки покажуваат како вода тече во еден од тунелите и ги покрива шините додека стотици патници чекаат со куфери на станицата „Сент Панкрас“ во Лондон.
„Разбираме дека ова е важно време за патување на крајот на празниците и во пресрет на Новата година и им помагаме на патниците на станиците“,
соопштија од „Еуростар“.
Ова е втор пат возовите на Еуростар да доцнат за време на овогодинешните божиќни празници.
Неочекуван штрајк на француските работници го прекина божиќното патување на илјадници патници на 21 декември годинава.
Извор: 360stepeni.mk
