ИСТАНБУЛ (АА) – Премиерот на Полска, Доналд Туск, објави дека неговата Влада размислува за повторно воведување гранични контроли со Германија и Литванија поради сè поголемата загриженост за илегалната миграција, пренесува Анадолу.
На прес-конференција Туск најави дека ќе се одржи безбедносен состанок со претставници од Министерството за внатрешни работи, граничната стража, војската и полицијата за да се процени вкупната состојба на државните граници, јави државната новинска агенција ТВП Ворлд вчера.
„Германската страна е информирана дека, доколку продолжат сомнителните случаи, може да бидеме принудени повторно да воспоставиме контроли на полско-германската граница,“ изјави Туск.
Тој нагласи дека безбедноста на границите е еден од главните приоритети на Владата.
Туск додаде дека секоја одлука ќе биде спроведена на начин што ќе предизвика минимални непријатности за полските граѓани и нагласи дека ќе бидат преземени мерки и за спречување на илегални преминувања од Литванија во Полска.
На посебна прес-конференција претседателoт во заминување Анджеј Дуда, исто така, побара од Владата да дејствува за да спречи враќање на илегални мигранти од Германија во Полска.
Дуда ја критикуваше Владата за нејзиното молчење во врска со принудните враќања, изјавувајќи: „Не смееме да дозволиме да се крши законот и мигрантите насила да се туркаат во нашата земја. Германија го создаде овој миграциски проблем и мора сама да се справи со него. Ние нема да го решаваме место неа.“
Во меѓувреме, стотици луѓе што се нарекуваат „граѓански патроли“ организираат протести во граничните подрачја на Полска со Германија за враќањето на мигрантите од германските власти.
Во саботата, околу 200 луѓе го блокираа патот во северозападниот полски град Шчеќин, велејќи дека се собрале за да ја спречат „германската полиција да внесува мигранти“.
Извор: Anadolu Agency (AA)
